Avataasiornermi umiarsuarsuit sivisuumik avataasiorsinnaasut qerisuusivillu ulikkaaraangat usingiartartut aalisakkajupput. Avalanneq sapaatip-akunnerinik arlalinnik sivisussuseqarsinnaavoq.

Sinerissap qanittuani aalisartoqartillugu umiatsiaaqqat aalisariutillu sinerissap qanittuani aalisarfiup aallartiffianiit sømilinik pingasunik ungasinnerunngitsumi aalisatartarput.

Nunatsinni inuit 4.300-nit ikinnerunngitsut aalisarnermik inuuniuteqarlutillu aalisakkerinermik aalisakkanillu niueruteqarnermik suliaqarput (stat.gl), tamanna nunatsinni sulisinnaasut 15%-eraat. Taamatuttaaq aalisakkat qaleruallillu nunatsinniit avammut tuniniarneqartartuni annertunerpaapput.

Sinerissap qanittuani aalisartut

Royal Greenland nunatta sineriaani tunisassiorfinni annerusuni minnerusunilu 37-ni tunisinissamut 2019-imi periarfissaqartitsivoq. Aalisarneq kisimi amerlasuutigut nunaqarfinni inuuniutigineqarmat tamanna ingammik ikittunik innuttaasulinnut pingaaruteqarpoq.

Sinerisasp qanittuani aalisarnermi namminersorlutik inuuniutigalugu aalisartut, ukioq naallugu ukiulluunniit ilaa aalisartartut, amerlanerussuteqarput. Aalisatut katillugu 2.156-it 2019-imi Royal Greenlandimut tunisisimapput, tassa imaappoq aalisarnermik inuuniuteqartut affaat sinnilaarlugit Royal Greenlandip tunisassiorfiinut tunisisarput.

Takussutissami takusinnaasattuut aalisartut 550-it missaanniittut Royal Greenlandimut tunisisimammata aalisartut amerlassusaat 2010-miit mannamut malunnartumik qaffassimavoq. 

Aalisartut amerlanerit namminersortunngornissaminnut aamma qaleralinniarnissaminnut nammineq akuersissuteqalernissaminnut periarfissinneqarnerat 2016-imi aalisartut amerleriangaatsiarsimanerannut pissutaavoq. Aalisariutit amerlassusaat nikinngitsut avannaani aalisarfinni Qeqertarsuup Tunuani, Upernavimmi aamma Uummannami aalisarnissamut akuersissutit 2015-imut sanilliullugu 27%-imik amerlanerusut tunniunneqarsimapput. Assingusumik annikinnerusumilli 2019-imi pisoqarpoq.

Taamatuttaaq saarulliit amerleqqimmata aalisartut amerleqqipput. Aalisartut katillugit 1.760-it 2022-mi pisatik Royal Greenlandimut tunisimavaat, tassa imaappoq aalisakkerinermik suliaqartut 40%-iisa missaat Royal Greenlandip tunisassiorfiinut tunisisarput.

Kalaallit Nunaanni Namminersorlutik Oqartussat ukiuni kingullerni marlunni aalisarnissamut akuersissutinik nutaanik tunniussinissaq matoqqatissimavaat, taamaammat aalisartunik nutaanik aalisalersoqanngilaq. Pisuussutit pinngortitameersut nungusarneqassanngimmata aaqqiissut taanna aalisakkanik pisuussutinik akisussaassuseqartumik aqutsinermut ilaavoq. Aalisartut ikinnerulaaraluartut tulaanneqartartut annertussusaat allanngorsimanngilaq.

Aalisarnermi umiatsiaaqqat

Umiatsiaaraq motoorigissoq aalisartumut namminersortumut sakkuuvoq pingaarutilik. Aalisarorpassuit pujortuleeqqani inuttaasaraluartut nammineq umiatsiaararsisimapput. Umiatsiaaraq atoruminartuuvoq, motooria pujortuleeqqap motoorianut sanilliullugu taarseruminarlunilu iluarsaruminartuuvoq inunnillu ataatsimik marlunnilluunniit passukkiminarluni. Qaleralinniartoqartillugu inuup ataasiinnaap kisimiilluni sakkut tamaasa isumagisinnaavai.