48. mio. DKK. 

Tassa 2024-imut sanilliullugu Royal Greenlandip, akileraarut suli akilernagu, 2025-imi ukiup affaanut angusaani pitsanngoriaat. 2023-imut sanilliullugu pitsanngoriaat 102 mio. DKK-iuvoq.

Angusaq, angusarissaarnerulerumalluni 2024-imi aalajangiussat tamanna kinguneraat, ilanngullugu angusarissaarnerulerumalluni  pilersaarut ”Back-to-Black”, suliniut taanna isertitanik aningaasartuutikillisaanernillu annertuunik suliffeqarfissuarmut qulakkeerinnissimavoq. Pilersaarut annertooq 2024-imi aallartinneqarpoq suliffeqarfissuup, pingaartumik aningaasartuutaasa, piaartumik misinnartumillu iliuuseqarfigineqarnissaat qulakkeerumallugu. Angusarissaarnerulerumalluni pilersaarutip kingunerisaanik ukiunut pingasunut atuuttussamik suliffeqarfissuup periusissiaa ”INUA 2027” ineriartortinneqarpoq aalajangiunneqarlunilu, taannalu aamma maannakkut suliffeqarfimmi pitsaasumik sunniutinikkiartuaalerpoq.

- Maanna ukiup affaanut naatsorsuutit tigummiarlugit uppernarsivarput, aningaasaqarnikkut anguniakkat periusissiatsinni nutaamiittut qanillisimallutigit: 2027-imi EBIT-margin 5 % aamma akileraarutit suli akilernagit 250 mio. DKK sinneqartoorutit angussallugit. Kisianni tamatumani piumasaqaataavoq, nangittumik siunnerfilimmillu aningaasartuutinik annikillisaanissarput isertitatsinnillu pitsanngorsaanissarput, niuerfinni allanngorartuartumi, taama oqarpoq Preben Sunke, pisortaanerugallartoq.

Pissutsit unammillernartut
Angusaq akileraarutit akilinnginnerini 11 mio. DKK-nik amingartoorfiuvoq, tamannalu ”naammaginanngitsutut” nalilerneqarpoq, naak ukiumut kingullermut sanilliullugu pitsanngoriartoqaraluartoq – ungasinnerusoq isigalugu suliffeqarfissuup aningaasaqarnikkut anguniagai eqqarsaatigalugit. Angusat anguneqarput piffissami Royal Greenlandip arlalitsigut unamminartorsiornerata nalaani, soorlu aalaakkaasumik sikuusarunnaarnera, pisat ikilinerat aamma aalisariutit ingerlanneqarneranni kinugaattoornerit eqqarsaatigalugit, tamakkumi pissutigalugit qaleralinniarneq, raajarniarneq nipisanniarnerlu ajortumik sunnerneqarmata. Taamaattorli sinerissap avataani qaleralinniarneq saarullinniarnerlu patajaatsumik ingerlavoq, aamma Tunumi ammassanniarneq aallarteqqinneqarpoq.

Tunisassiassat tunineqartut 2024-imi piffissap taamaalineranut sanilliullugit 11 %-imik appariarput.

Nunani allani ingerlatat
Nunani allani ingerlatat qiviaraanni, Canadami angusat ajoriinnagassaanngillat ukiup affaani siullermi pisaqarluarsimaneq tunngavigalugu. Chilemi pilersaarusiaq malinneqarpoq, nalilersuinerillu naammassereermata aalajangiunneqarpoq suliffeqarfissuup Chilemi ingerlataminut piginneqataassutai tuniniarneqassasut. Royal Greenlandip Norgemi suleqataa, Maniitsoq A/S, saattuarniarsinnaanerminut atatillugu suliami aalajangiiffigineqaqqammerpoq, saattuarniarsinnaanerminut akuersissummik arsaarneqarnera aalajangiusimaneqartoq. Taamaalilluni Royal Greenlandip Norgemi Maniitsoq A/S-imik suleqateqarnini taamaatinniarlugu suliamik aallartitsissaaq.

Ukiup affaata tullia
2025-imi ukiup affaata aappaani Royal Greenlandip naatsorsuutigaa, raajarniarnerup aamma sinerissap qanittuani qaleralinniarnerup saarullinniarnerullu unammillernartorsiorfiunissaat. Suliffeqarfissuup sinerissap avataani qaleralittassaasa agguaateqqinneqarnissaat, politikkikkut anguniagaasoq, piviusunngortinneqassappat, taava ukiup affaata aappaani angusat ajortumik sunnerneqassapput. 

Taamaattorli, niuerfinni akit pitsaasumik inissisimanerat aammalu kilisaatip nutaap teknikkikkut atortorissaaqisup Kaassassuup tikinneratigut, suliffeqarfissuullu kilisaataasa tamarmiulernerisigut, ukiup affaata aappaani sinneqartoorutit siuariarnissaat naatsorsuutigineqarpoq.

- Royal Greenland Namminersorlutik Oqartussanit suliffeqarfiutigineqarnermigut immikkut inuiaqatigiinnut akisussaaffeqarpoq, tamannalu pimoorulluinnarlugu tiguarput. Taamaattumik ullut tamaasa sulivugut suliffeqarfipput akisussaassuseqartumik ineriartortinniarlugu – ataavartumik misissortuarparput qanoq iliorluta tunisassiatta pitsaalluinnartut nunarsuaq tamakkerlugu pisisartunut tunisartakkatta akigissaartitsinerulersinnaanerat, peqatigitillugulu ataavartumik suliffeqarfitsinni pisariillisaaneq naammassisaqarsinnaassuseqarnerlu pitsanngorsarniarlugit ukkassiuarluta. Taamaaliorpugut, naggataatigut suliffeqarfimmut, sulisorisatsinnut pikkorissunut inuiaqatigiinnullu kalaallinut naleqarnerulersitsiniarluta, taama Preben Sunke oqarpoq, oqaluttuarporlu ukiuni aggersuni Royal Greenlandip aningaasalersuinissaani Kalaallit Nunaanni nunami tunisassiorfiit ukkatarineqartussaasut. Tamatumani alloriarneq pingaarutilik pivoq Tasiilami tunisassiorfiup pilersinneqarneratigut, 2025-imi tunitsivigineqarnissaminut ammarneqareersoq.

For yderligere information 
Kommunikationskonsulent Mai Christensen Bøj 
E-mail: mach@royalgreenland.com 
Telefon: +45 25463307