Royal Greenlandip Tom Kaster-i tunisassiornermi pisortatut atorfinitsippaa. Tom Kaster-i atorfittaamini nutaami 1.juni 2026-i aallartissaaq. Nuummi qullersaqarfimmi allaffeqassalluni Nuummilu najungaqassalluni. Tom
Kaster-i siornatigut Royal Greenlandimi aqutsisuni qitiusumik ilaasortaasimavoq, ukiunilu arlalinni Kalaallit Nunaanni nunami tunisassiornermi siuttuusimalluni.

Sulisut aqutsisullu qanimut nuna tamakkerlugu suleqatigisimavai taamaasillunilu Kalaallit Nunaanni tunisassiornikkut aammalu immikkut ittut suleriaatsit Kalaallit Nunaanni pissutsit atuuttut ilisimmaffaarillugit. Tom Kaster-i ukiuni arlalinni nunani tamalaani inuussutissalerinermi qullersatut arlalinni atorfeqareersimalluni maanna Royal Greenlandimut uterpoq.

Nunarsuaq tamakkerlugu pilersuinermik tunisassiornermillu ingerlatsinermi misilittagaqarluarpoq, tassanilu suliffissuaqarnermut, pisiortornermut, assartuinermut, pitsaassutsimut, sulisut atugarissaarnissaannut digitaliseerinermullu akisussaasimavoq, kiisalu periusissiornermut aningaasaliinernullu.

”Tom-i Royal Greenlandimut uteqqimmat nuannaarutigeqaarput. Suliffeqarfipput, sulisuvut nunatsinnilu pissutsit nalunngilai – tamatumalu saniatigut piffissami kingullermi misilittagaqarluarsimavoq ingerlatseqatigiiffiup ineriartortinneqarnerani iluaqutaasinnaasunik. Suleqatigiinneq, ataqqinninneq nunamilu pissutsinik paasinninnissaq aqqutigalugit angusaqarluartoqarsinnaasoq takutissimavaa, tamannalu uagutsinnut pingaaruteqarpoq,” pisortaaneq Toke Binzer-i taama oqarpoq.

Tunisassiornermi pisortartut Royal Greenlandimi suliffeqarfimmi immikkoortortaqarfinni tamani akisussaaffik tingummissavaa – Kalaallit Nunaanni nunani aammalu nunat tamalaani.

Anguniarneqarpoq inuussutissat isumannaatsuunissaat, pilersuineq pisiniartartutsinnut aalajaatsoq, aammalu ingerlatsineq aalajaatsoq, sumiiffimmi naleqalersitsineq – suliffeqarfikkut pilersitsinermi, inuttut pinginnaasatigut ineriartortitsineq aammalu piujuartitsinikkut niuerneq aqqutigalugu.

“Royal Greenlandimut uterneq assut nuannaarutigeqaara. Suliffeqarfik nunatsinnut immikkut pingaaruteqarpoq, suleqatigisimasakka, sulisut nutaallu suleqatigalugit tunisassiornerup nukittorsarnissaanut Kalaallit Nunaannullu nunarsuarmilu tamarmi sullitatsinnut naleqarnerulersitsinissamut qilanaarpunga,” Tom Kaster-i taama oqaaseqarpoq.

Tom Kasterimik atorfinitsitsineq Royal Greenlandip suliffeqarfimmik ineriartortitsineranut suliffeqarfiullu nukittuujuarnissaanut – nunatsinni nunanilu allani – qulakkeerinninnerminut ilaavoq.