Royal Greenlandip nunarsuaq tamakkerlugu tuniniaanermut attaveqaqatigiinnermullu sulineranut atatillugu suliffeqarfik Seafood Expo North America-mi (SENA) Bostonimi ingerlanneqartumi peqataaqqippoq. Seafood Expo North America Amerikap Avannaani aalisakkanik nioqquteqartartuni annerpaavoq. 

Ataasinngormat aalisarnermut Naalakkersuisoq Peter Borg Royal Greenlandip saqqummersitsivianut pulaarpoq, tassanilu suliffeqarfiup nunarsuaq tamakkerlugu qanoq suleriaaseqarnersoq paasisaqarfigalugu.

Aamma kalaallit aalisagaannik qalerualinnillu tuniniaasinnaassagaanni nunani tamalaani niuerfiit atorluarnissaat naatsorsuutigineqarpoq aammalu qanoq pisariaqartigisoq eqqartorneqarluni -  Kalaallit Nunaatalu aningaasaqarneranut kaaviaartitseqataanermik ,suliffeqarfinnik pilersitsinermi, isertitanillu pilersitsinermi iluaquteqartumik nassataqarluni.

“Nunani tamalaani niuerfiit qanoq ingerlanersut, aamma kalaallit aalisakkanik tunisassiaasa nunarsuaq tamakkerlugu tuniniarneqarsinnaanissaannut taakkununnga pisiniarnissap pingaaruteqassusia qanimut misigisimallugit naleqangaarpoq. Nunani tamalaani tuniniaasarneq niuerfinnullu iserneq Kalaallit Nunaanni suliffissanik, isertitassanik aningaasaqarnikkullu ingerlatanik tapersersuinermut pingaaruteqarpoq. Taamaattumik tikeraarninni pingaarnertut siunertaraara Amerikap Avannaanut avammut niuernerup annertusarnissaa, ullumikkumut naleqqiullugu nunanut allanut niuerfiusunut amerlanerusunut nioqquteqarnerup siammarternissaanut. ” Aalisarnermut, Piniarnermut, Nunalerinermut, Imminut Pilersornermut Avatangiisinullu Naalakkersuisoq Peter Borg tikeraarnerminut atatillugu taamak oqaseqarpoq.

Ukiut ingerlanerini Royal Greenland nunani tamalaani niuernermi nukittuumik inissisimaffeqalersimavoq, suliffeqarfiullu kaaviiaartitaasa 99 procentii nunanit tamalaanit pissarsiarineqartarlutik.

Taamatut nunat tamalaat akornanni niuerneq pingaaruteqarpoq kalaallit tunisassiaasa suliffinnik, isertitanik aalisarnermilu inuiaqatigiinnilu sinerialinni siunissaq ungasinnerusoq eqqarsaatigalugu ineriartornermik kinguneqarnissaannut.

”Naalakkersuisup pulaarnera nuannaarutigeqaarput suliatsinnullu soqutiginninnera qujamasuutigalugu. Nunarsuaq tamakkerlugulu  niuernikkut peqataanitta aammalu tuniniaanerup Kalaallit Nunaanut toqqaannartumik iluaqutigisaraa takutissallugu pingaaruteqarmat” Toke Binzer-i Royal Greenland-mi pisortaaneq taama oqaaseqarpoq.