Suliffeqarfiup siunissami nukittunerunissaanik qajannaannerunissaanillu qulakkeerinnittussanik 2024-mi ajornakusoortunik pisarialimmilli aalajangiisoqartariaqartarsimavoq. Nalinginnaasumik ingerlatat siornamut sanilliullugit 116 mio. DKK-nik pitsaanerusumik angusaqarfiuvoq, angusallu pingaarnertut tunisassiat ineriartortinnerunerinit pipput, tunisassiallu tassaasut saattuat snekrabbet, saarullit kiisalu raajat uusut qalipaajakkallu - raajalli qalipallit ilanngunnagit. Angusaq pitsaasutut isigaarput.

Ingerlatsineq siusinnerusukkut ingerlatsinertut suli peqqinngilaq, ukiumilu angusat nalikilliliinermik ilaqartut Royal Greenlandimut naammaginanngillat.

Akileraarutit akilinnginnerini angusat tassaapput -196 mio. DKK kaaviiaartitalli tassaapput 5,6 mia. DKK. Tunisat annertussusaat 2 %-imik qaffariaraluartut angusat kinguarialaarnerinik takutitsipput. Niuernermik ingerlatsinitta ingerlalluaqqilernissaa qularnaattumik tunaartaraarput sinneqartoorutillu 5 % EBIT anguniarlutigu.

Niuerneq pitsaasumik ineriartorpoq pingaarnertullu tunisassiat siuariartorfiupput

Pingaarnertut tunisassiat arlallit siuariarfiunerisigut pingaarnertut nioqquteqarfiusut 2024-imi Royal Greenlandimut pitsaasimapput.

"Saarulliit, qalerallit kiisalu raajat uusut qalipaajakkallu angusarissaarfigigatsigit nuannaarutigaara. Nunatsinni saarullinnik nunami tunisassiornerput siullermeerluni oqimaaqatigiissumik ingerlavoq, Europamiit, Asiamiit Amerikallu Avannaaniit pisiortorusunnerup annertusiartornera akillu qaffakkiartornerat nalaapparput. Tamakku 2025-mi angusassatsinnut aallarnisaataalluarput," Preben Sunke, Royal Greenlandimi pisortaanerugallartoq oqarpoq.

Saarullinnik tunisasssiornerput ataatsimut isigalugu sinneqartoorfiulluni pivoq, ingerlatallu Tunumi Barentshavemilu kilisalluni aalisarnermit iluaqusersorneqarput kiisalu Nutaaq-saarulliit tunisassiorneq 10.000 tonsimut qaffannikuulluni. Kina-mi, Japanimi Taiwanimilu pingaarnertut nioqquteqarfivut qaleralinnik piumanerat assut annertusiartorpoq kiisalu Amerikami tunisaqartarnerput siuariartorfiulluni. Raajat uusut qalipaajakkallu siumukariartorfiupput, tassami sunniuteqarnerusumik tunisassiorneq tunisallu akisunerunerat sinneqartoortitsipput. 

 

Iliuusissatut pilersaarut ’Back to Black’ sunniuteqarluarpoq

Iliuusissatut 2024-mut pilersaarutitsinnut ilanngullugu annertuumik pitsanngorsaasimavugut, tamatumanilu 2023-mut sanilliullugu niuerfigisatsinni pitsanngoriaatit ingerlatsinitsinnut 116 mio. DKK-nik pitsanngoriarfiullutik 52 mio. DKK-nik sipaaruteqarnikuulluta.

Iliuusissatut pilersaarut nangittumik 2025-mi ingerlatissavarput, 2025-milu iluanaaruteqarluta ingerlaqqilernissarput naatsorsuutigaarput, Royal Greenlandimi pisortaanerugallartoq, Preben Sunke, oqarpoq.

Chilemi Norgemilu ajornartorsiutit angusanut tamarmiusunut sunniuteqarput

Ingerlatsinermi annertuumik pitsanngorsaasoqaraluartoq ukiumi angusat nunani allani ingerlatanit pitsaanngitsumik sunnerneqarput:

• Chile: Ingerlatanit iluanaarutissatut naatsorsuutigisavut anguneqanngillat, tamannalu pissaraluanit 220 mio. DKK-nik nalikilliliinermik kinguneqarpoq. 
  
  
• Norge: Suleqatigisartakkatta saattuniarniarnissamut akuerissut pinngitsoornikuaat, tamatumalu kingunerisaanik 2025-mi aalisarsinnaanatik. Tamanna tunngavigalugu pissaraluavut 57 mio. DKK-nik nalikillilerneqarput.

Nalikilliliinerit tamakku katillugit 277 mio. DKK-nik nalikilliliiviupput, soorunami ukiumut angusassanut assut sunniuteqarput, Preben Sunke oqaluttuarpoq.

 

Taarsigassaqarnermik inissisimaffik nukittorsarneqarpoq – sulili pitsanngorsaasoqartariaqarpoq

Taarsersukkatta erniai 2024-mi 264 mio.-nik ikileriartippavut. Tamatuma kinguneranik aningaasalersuinerput siorna 37,7-iusoq maanna 7,7-imiilerpoq - ilorraap tungaanut alloriarneq annertooq.

2025-mi pitsaasumik aallartinneq

Pingaarnertut niuernermi ingerlatsinitta nukittorsarfigineratigut periusissiornikkullu ersarissumik tunaartaqarnitsigut nunatsinni inuiaqatigiinnut iluaqutaasussamik pitsaasumik tunngavissiivugut. 2025-mi qaammatit siulliit angusaqarfiulluarpoq, ukiulli ingerlanerani siuariartornissarput unammillersinnaassutsittalu nukittorsarnissaa qilanaaraarput.

Taamatut ikaarsaarnitsinni sulisuvut, aalisartut pisisartuvullu tapersersuinerinut suleqataanerinullu qutsavigiumavavut.

 

Annertunerusumik paasisaqarusukkuit attavissaq:

Suliffeqarfissuarmi attaveqaqatigiinnermut ingerlatsisoq, Merete Lindstrøm
+299 28 18 20
meli@royalgreenland.com