Royal Greenland ullumikkut immikkut ittumik ataatsimeersuarpoq upernaaq suliffeqarfissuup ileqquusumik ataatsimeersuarnerata malitsigisaatut.

Ataatsimeersuarnermi Niels Thomsen Royal Greenlandip siulersuisuini siulittaasunngorpoq. Niels-ip taamaalilluni taarserpaa Maliina Abelsen 2022-miilli atorfimmi tassani issiasimasoq.

”Qujamasuppunga tatiginninneq piginnittup takutitaa pillugu, allaat Royal Greenlandimi siulersuisuni siulittaasutut toqqarsinnaammanga. Akisussaaffimmik taamaattumik tiguserusunnerluni aperineqaraanni naaggaartoqarsinnaanngilaq – pingaartumik suliffeqarfissuup inuiaqatigiinnut kalaallinut atuuffia pingaaruteqarneralu eqqarsaatigalugu.”

Royal Greenland Kalaallit Nunaata aningaasarsiornerani pingaaruteqarluinnarpoq nunarsuarmilu aalisakkanik tunisassiornermi qitiusumik inissisimavoq. Ukiut unammillernartut aqqusaarsimavagut, siuariartornerli maanna takusinnaalerparput. Sulineq aatsaat aallarteqqammerpoq. Suli ineriartoqqissuugut, niuernerpalaartumik ukkassinerput nukittorsassavarput qulakkeerniarlugulu nunarsuarmi unammillertigisatta anginerpaat unammillersinnaassuseqarnerattulli minnerpaamik unammillersinnaassuseqalernissarput.

Anguniarpara Royal Greenland suliffeqarfiussasoq pitsaasumik ingerlanneqartoq unammillersinnaassuseqartorlu, peqatigitillugulu Kalaallit Nunaanni suliffeqarfinni anginersaanini pissutigalugu inuiaqatigiinnut akisussaaqataasussaanerminik naammassinnissinnaasoq. Maani Nunatsinni niuernikkut sammisanut aningaasalersuinigut ukkatissavagut, nunarsuarmi inissisimanitsinnik nukittorsaanissaq Kalaallit Nunaannilu siuariartornermik periarfissanillu angusaqarnissaq siunertaralugu.

Qilanaarpunga – siulersuisut pisortaqatigiit, sulisut piginnittullu peqatigalugit – allanngortitsiartuaarneq nangissallugu, Royal Greenlandimik suliffeqarfittut suli nukittunerulersitsisussaq, Kalaallit Nunaannut iluaqutaasumik-

Naggataatigut, periarfissaq manna atorlugu Maliina Abelsen qutsavigerusuppara, 2022-miilli Royal Greenlandip siulersuisuini siulittaasutut sulisimanera pillugu,” taama oqaaseqarpoq Niels Thomsen-i.

Maliina Abelsen-i oqaaseqarpoq:

”Ukiuni pingasuni pikkunartuni Royal Greenlandimi siulittaasooreerlunga, maanna atorfik toqqissillunga tullissannut Niels-imut ingerlateqqippara. Ataqqinaataasimavoq angusarissaarnerulernissaq anguniarlugu sulineq piumasaqaatitaqarfioqisoq siulersussallugu nunanilu allani ingerlatat ilaanni saleeqataassalluni, periusissiap INUA 2027-i atuutsilissallugu, Nuummi aqutsisoqarnikkut nukittorsaassalluni qullersaqarfimmillu nutaamik sanaartornermik aallartitsissalluni. Tamanna aalajangiinernik imaannaanngitsunik piumasaqarfiusimavoq, uannulli pingaarnerpaajujuaannarsimavoq, Royal Greenlandip inuiaqatigiinnut kalaalllinut iluaqutaanissaa. Angusat ataatsimoorluta pilersissimasagut tulluusimaarutigaakka. Siulersuisunut, pisortaqatigiinnut, sulisunut, piginnittunut attaveqarfigisartagarisimasanullu suleqatigiissimanitsinnut qujavunga.”

Siulittaasumik taarsiinerup saniatigut ataatsimeersuarnermi Susanne Kure aamma siulersuisuni ilaasortaq nutaatut tikilluaqquneqarpoq. Susanne aningaasarsiornikkut nukittuumik pisinnaasaqartutut aammalu inuussutissarsiornermik siulersuisunilu qajannaatsumik misilittagaqarluni suliffeqarfinni tunuliaqutaqarpoq aningaasalersuinermik aningaasaateqarfinni soraarnerussutisiaqalernissamullu aningaasaateqarfinni arlalinni peqataaffigisarsimasamini misilittagaqarluartuulluni.

Ukiup affaanut naatsorsuutit ajunngitsumik takutitsipput

Immikkut ittumik ataatsimeersuarneq, maajimi 2025-imi ileqquusumik ataatsimeersuarnermi ilimasaarutigineqarsimasoq, ingerlanneqarpoq, Naalakkersuisut nutaat Naalakkersuisoqarfimminni suliassaminnut iserniarlutik piffissaqareersullu - suliffeqarfissuit Namminersorlutik Oqartussat pigisaat, soorlu Royal Greenland, ilanngullugit.

Ataatsimeersuarneq ingerlanneqarpoq ippassaammat Royal Greenland 2025-imi ukiup affaanut naatsorsuutiminik saqqummiussereersorlu. Naatsorsuutit ukioq kingullermut sanilliullugit 48 mio. DKK- nik pitsanngoriarnermik takutitsisut, 2023-imillu sanilliullugit 102 mio. DKK-inik pitsanngoriarfiusut.

Paasissutissat annertunerusut pineqarsinnaapput

Attaveqaqatigiinnermut siunnersorti Mai Christensen

E-mail: mach@royalgreenland.com

Oqarasuaat: +45 25463307