Royal Greenland 2026-imi ukiup affaani siullermi akileraannginnermi 217 mio. kr.-nik angusaqarpoq, siorna piffissami tassani 11 mio. kr.-nik 
amigartooruteqarsimalluni. 

Niuffaffinni akit qaffasinnerusut suliffeqarfiullu ingerlatsineranik nukittorsaanissamik 
suliniuteqarneq ukiup qaammataani siullerni arfinilinni siuariarnermut iluaqutaapput. 
Peqatigisaanik Royal Greenland sinerissami tunisassiorfinnut aningaasaliinini 
ingerlatiinnarpai, tunisassiornerup pisinnaasaa aalisarnerup ineriartorneranut 
naleqqussarniarlugu.  

Siorna piffissami tassani angusatsinnut sanilliullugu malunnaatilimmik 
pitsaanerusumik angusaqarpugut, tamannalu naammagisimaarparput. Niuffaffinni akit 
pitsaasut annertuumik pingaaruteqarsimapput, angusarlu aamma suliffeqarfik 
tamakkerlugu pitsanngorsaanerit ingerlassimasatta sunniutaanik ersersitsivoq. Royal 
Greenlandip nukittunerulernera ingerlatsinitsinnut aningaasaliinissamut aammalu 
pisuussutit uagutsinnut isumagisassanngortinneqarsimasut atorlugit nalilinnik 
pilersitsinissamut pitsaanerusunik periarfissaqalersippaatigut – suliffeqarfimmut 
inuiaqatigiinnullu kalaallinut iluaqutaasumik, pisortaaneq CEO Toke Binzer oqarpoq.  

Kaaviiaartitat ukiup affaani siullermi 16,5 %-imik qaffariarput, tunisat annertussusaat 
siornatulli annertussuseqaannaraluartut. Isertitaqarnerup siuariarneranut pingaartumik 
Royal Greenlandip pingaarnertut tunisassiaasa arlallit tunineqarneranni akit 
qaffasinnerusut, suliffeqarfiullu ingerlatsineranik nukittorsaanissamik 
naleqqussaanissamillu siunertalimmik suliniuteqarneq pissutaapput.

Aningaasaliinerit Kalaallit Nunaanni tunisassiorneq nukittorsassavaat 

INUA 2027-ip ilaatut Royal Greenlandip tunisassiornerup aalisarnerup 
ineriartorneranut naleqqussarnissaa aammalu tunisassiassat 
pissarsiarineqarsinnaasut atorluarneqarnerisa naleqarnerulersitsiniarnerullu 
annertusarnissaat pillugit suliniutini ingerlatiinnarpai. Tamanna ilaatigut sinerissami 
tunisassiorfiit arlallit aningaasaliiffigineqarnerisigut ullutsinnullu 
naleqqussarneqarnerisigut pissaaq. 

Sisimiuni raajaleriffik ullutsinnut naleqqussarneqarpoq, tunisassiorneq 
eqaannerulersinniarlugu raajallu suliarineqartut annertunerusumik 
pissarsiaqarfiginiarlugit, Sarfannguanili, Attumi Paamiunilu ilaatigut aningaasaliinerit 
saarullinnik tigooraasinnaanermut suliarinnissinnaanermullu periarfissat 
nukittorsassavaat. Nuummi Royal Greenland aamma saarulliit niaquinik atuinissamik 
aallartissimavoq, aningaasarsiornikkut pitsaasunik angusaqarfiusumik. Anguniagaavoq 
piffissap ingerlanerani aalisagaq annertunerusumik atorluarneqassasoq, 
taamaalillunilu tunisassiamit ataatsimit isertitaqarnerup annertusarnissaa. Angusat 
pitsaanerusut Royal Greenlandimut aningaasaliinerit taakku piffissamut ungasissumut 
atuuttut ingerlatiinnarnissaannut nukittunerusumik tunngavissiipput, aningaasaliinerit 
suliffeqarfiup unammillersinnaassusaanik nukittorsaassallutik peqatigisaanillu Kalaallit 
Nunaanni suliffissaqartitsinermut nalilinnillu pilersitsinermut iluaqutaassallutik. 

Aalisarneq allanngoriartorpoq, taamaattumillu tunisassiornermi atortulersuutigut 
tunisassiassat pissarsiarineqarsinnaasut allanngoriartornerannut naleqqussarlugit 
ineriartortinneqassapput. Aningaasaliinerit saarullinnik amerlanerusunik 
tigooraasinnaalersippaatigut, tunisassiassat annertunerusumik atorluarsinnaalersillugit 
aammalu Kalaallit Nunaanni nalilinnik amerlanerusunik pilersitsisinnaalersilluta. 
Aningaasaliinerit taakku piffissamut ungasissumut atuupput, 
unammillersinnaassutsitsinnik aammalu inuiaqatigiinnut akisussaaffitsinnik 
naammassinnissinnaassutsitsinnik nukittorsaasut, pisortaaneq CEO Toke Binzer 
oqarpoq. 

Suliffeqarfiup ingerlatsinerata nukittorsarneqarnissaanik suliniuteqarneq ingerlatiinnarneqarpoq 

Angusat malunnaatilimmik pitsanngoriaateqaraluartut Royal Greenland suli 
siuariartorfissaqarpoq. Aningaasartuutit suli qaffasipput, ilaatigullu raajartassarititaasut 
ikiliartornerat tunisassiassanik pissarsisiniarnermut ajornakusoortitsivoq.  
Ukiup affaani kingullermi Royal Greenlandip isertitaqarnerup siuariartuinnarnissaa 
naatsorsuutigaa. Niuffaffinni pissutsit isumalluarnissamut tunngavissiipput, 
ineriartornerli nunarsuarmi politikkikkut pissutsit pissutigalugit suli nalorninartoqarpoq. 
Taamaattumik Royal Greenlandip INUA 2027-imi siunnerfik attatiinnarpaa, 
aningaasartuutit ikilisarnissaat, tunisassiassanik naammattunik pissarsisinnaanerup 
qulakkeerneqarnissaa kiisalu tunisassiat suliarineqarsimasut niuerfinnut 
tunineqarnerisa annertusarnissaat qitiutillugit.