Royal Greenlandip piginnittut, sulisut soqutigisaqartullu ippassaq Nuummi qullersaqarfimmi ataatsimeersuarnermut katersortippai. Ataatsimeersuarnermi 2025-mut ukiumut nalunaarusiaq akuerineqarpoq, ingerlatseqatigiiffiullu ingerlalluarnera erseqqissarneqarluni.

“Ingerlatseqatigiiffik eqqortumik sammiveqalersimasoq Naalakkersuisut nuannaarutigaat. Ukiuni kingullerni ingerlatsinerup iluarsartuunneqarneranut nukittorsarneqarneranullu sulineq annertooq maanna angusaqarfiuleriartorpoq, tamannalu suliffeqarfiup imminut katersorsinnaasup tunniussaqarsinnaasullu takussutissaraa. Tamanna pitsaasuuvoq. Naalakkersuisut peqatigitillugu erseqqissaatigaat suli anguniakkamut anngutinngitsugut, aammalu pitsaasumik sammivik ukiuni aggersuni attatiinnarneqarlunilu nukittorsarneqassasoq,” Naalakkersuisut siulittaasuat Jens-Frederik Nielsen oqarpoq.

Siulersuisuni siulittaasoq Niels Thomsen sinnerlugu siulittaasup nalunaarutaa siulittaasup tullianit Preben Sunke-mit saqqummiunneqarpoq, Niels Thomsen qaniginerpaasamini toqusoqarnera pissutigalugu ajoraluartumik peqataasinnaanngimmat.

“Ingerlatsinermi angusat 299 mio. koruuninik annertussuseqarput, tamannalu ukiup siulianut sanilliullugu malunnaatilimmik pitsanngoriarneruvoq. Tamatuma peqatigisaanik EBIT-margin 6,2 %-imik angusimavarput, tamannalu 2027-mut periusissatigut anguniakkatsinnit maanna qaangeereerpoq. Tamanna tassaavoq ukiuni siusinnerusuni assut unammillernartorsiorfiusuni kingorna sammiviup toqqakkatta maanna sunniuteqariartulerneranut takussutissaq,” oqaluttuarpoq, erseqqissaatigalugulu Royal Greenland suli ineriartortinneqarnerup qeqqaniittoq, tassani ukkatarinninneq, annertuumik imminut piumaffigaluni ingerlatsineq aamma aalajangiussanik malitseqartitsineq aalajangiisuulluinnarlutik.

Siulersuisuni kiinnat nutaat

Ataatsimeersuarnermi siulersuisut katitigaanerat aamma allannguuteqarpoq. Karsten Høy Arnanguaq Holm Olsenilu siulersuisunit tunuarput, Juliane Henningsen Heilmann Morten Petersenilu ilaasortatut nutaatut ilaasortanngorlutik.

Tamatuma saniatigut Miki Brandt, Niels Ole Møller aamma Susanne Marie Olsen sulisunit sinniisutut toqqarneqarput, Sara Biilmann Egede aamma Johan Bertelsen peqatigitillugu tunuarlutik.

Oqalugiarnermini Preben Sunke-p ilaasortat tunuartut sulissutigisimasaat aammalu Royal Greenlandip toqqammaviata nukittorsarneqarneranut peqataasimanerat pillugit qutsavigai, siulersuisunilu nukissat nutaat suleqatiginissaat qilanaaralugu.