Royal Greenland Tokyomi immikkuullarissumik ataatsimeeqataavoq
Uani sapaatip akunnerani Tokyomi inuussutissarsiortut aallartitaasa pisortatigoortumik qallunaanit peqataaffigineqarnerani Ataqqinartorsuup Kunngi Frederik qulingata peqataanerani Nunarput qitiutinneqarpoq, tassani nunani tamalaanit peqataaffigineqartumi pisumi Nunarput sinnerlugu Royal Greenlandimit peqataaffigineqarluni. Aallartitani peqataasuni qallunaat suliffeqarfiini 18-iusut akornanni Kunngip nammineerluni marluinnaat oqaloqatigissallugit toqqarpai – taakkununnga ilaavoq Royal Greenland.
Ataatsimiinneq Tokyomi danskit ambassadeqarfianni pivoq, immikkuullaripporlu Nunarput inuiaqatigiillu qitiutinneqarmata. Pisortatiguunngitsumik oqaloqatigiinnermi Ataqqinartorsuup Nunatsinnut aamma Royal Greenlandip nuna tamakkerlugu ingerlatseqatigiiffittut nunatsinni inuiaqatigiinni tunngaveqarluartutut atuuffianut assut soqutiginninnini nuannarinninninilu takutippaa.
Sivittajaamik Japanimut suliffeqarfiup attaveqarsimanera aamma kalaallit aalisartut qanoq asiami niuerfinnut ullut tamaasa nioqqutinik pitsaasunik tulluusimaarlutik imaanullu ataqqinnillutik tunisisarnerat pillugu Royal Greenlandimit oqaluttuartoqarnerani Kunngi tunniusimalluarluni tusarnaarpoq.
"Kunngip naapinnera aamma nammineerluni soqutiginnilluni Royal Greenland aamma Nunarput pillugu tusagaqarusunnera misigalugu tulluusimaarnarpoq. Malugilluarsinnaavarput nunatsinnut asanninnera aalisarnermullu ataqqinninnera,” Royal Greenlandimi tuniniaanermut pisortaq, Robert Jan Treebus, ataatsimiinnermi Royal Greenlandimut sinniisaasoq oqarpoq.
Piujuartitsineq pillugu isumasioqatigiinnermi Ataqqinartorsuarmit ammarneqartumi nunarsuarmi tamarmi aaqqiissutinut tunngatillugu Issittup imartaatalu atuuffii pillugit oqallinnermi Royal Greenland aamma peqataavoq. Kingusinnerusukkut Kunngip Nunanut Allanut Ministeri aamma Inuussutissalerinermut, Nunalerinermut Aalisarnermullu Ministeri ilagalugit Royal Greenlandip saqqummersitsivia ornippaa.
Royal Greenlandimit innuttaasunillu Ataqqinartorsuup Nunatsinnut tikinnissaa qilanaarineqarpoq, sapaatip akunnerata tulliani nunarput tikeraarpagu – pisussaq nunatsinni tamarmi pinngitsoorani tulluusimaarnermik nuannaarnermillu pisoqarfiusussaq.