Pisortaanertut (CEO) nutaatut Toke Binzer-ip akisussaaffigaa, naliliinini naapertorlugu Royal Greenlandimik pitsaanerpaamik siumut ingerlatitseqqiisinnaasunik suliffeqarfissuup aqutsisoqatigiivinik inuttalersuinissaq. Sulinermi tamatumunnga ilaatillugu aalajangiunneqarpoq Jan H. Lynge-Pedersen aamma Robert-JanTreebus atorfimminnit tunuassasut.

Aalajangiineq Toke Binzer-ip suliffeqarfissuup aqutsisoqatigiivisa siunissami qanoq inuttalersorneqarnissaannik naliliineranik tunngaveqarpoq, Jan H. Lynge-Pedersenip Robert-Jan Treebus-illuunnit suliamikkut angusaannut, suliamut piginnaasaannut, tatiginassusaannut imaluunniit pissusilersornerannut attuumassuteqarani.

Taakku Royal Greenlandimi suliffigisaminni marluullutik suliffeqarfiup niuernikkut aningaasaqarnikkullu ineriartortinneqarneranut pingaarutilimmik peqataasimapput. Robert-Jan Treebus aamma Royal Greenlandip nunarsuaq tamakkerlugu tuniniaanermik aaqqissuussaanerata nukittorsarneqarnerani aamma Gdańskimi Europamut Shared Service Center-ip pilersinneqarnerani qitiusumik suleqataasimavoq.

Tunniusimanerat, suliaminnik piginnaasaqarluarlutik ingerlatsinerat aqutsisinnaassusiallu annertuumik pingaartinneqarsimapput, Royal Greenlandillu marluullutik annertuumik peqataasimanerat pillugu qutsavigai, siunissamilu ajunnginnerpaamik kissaallugit.