Royal Greenland ukiut kingulliit marluk unammillernartut aqqusaareerlugit 2025-mi sinneqartooruteqarluni  angusaqarpoq. Angusaq ingerlatseqatigiiffiup aningaasaqarnerata aaqqissuuteqqinneqarnerani pingaarutilimmik alloriarneruvoq, tamannalu anguneqarpoq massa pisat annikinnerusimagaluartut. Tamatuma peqatigisaanik aningaasartuutit annikillilerneqarput, ingerlatsineq pisariillisaavigineqarluni angusarissaarnarnerusumillu ingerlanneqalerluni. Ataatsimut isigalugu tamanna isumaqarpoq suliffeqarfissuaq (koncern) 2025-mi annikinnerusumik, kisianni pitsaasumik, 6 mio. kr.-inik angusaqartoq. Tamatuma peqatigisaanik ingerlatsinermi angusat (EBIT=suli erniat akileraarutillu akilernagit) 299 mio. DKK-nik naleqarput, 2024-mi 161 mio. DKK-niusimagaluartut.

“Tunisassiassanik ikinnerusunik suliaqaraluarluta kaaviiaartitat attatiinnarsinnaasimavagut. Tamanna niuerfinni akit qaffakkiartornerannik pissuteqarpoq, kisiannili annerpaamik aamma suliffeqarfimmi siunnerfilimmik suliniuteqarnermik, aningaasartuutinik sukannersumik aqutsinermik sunniuteqarluartumillu aaqqissuussinernik pissuteqarluni, taamaalilluta naggataatigut tunisassiassanit naleqarnerusumik pissarsisinnaalerluta,” CEO Toke Binzer oqarpoq nangillunilu:

“Isertitaqarnerput aningaasaqarnikkullu toqqavipput nukittorsarsimavagut, tamannalu ukiuni aggersuni Nunatsinni tunisassiornermut aamma nunami tunisassiorfinnut aningaasaliinissarput eqqarsaatigalugu pitsaanerujussuarmik aallaavissaqalersippaatigut.”

2025-mi pingaarutilimmik alloriarneruvoq pisortaqatigiit Nuummi katersorneqarnerat – aalisarnermut, tunisassiorfinnut aamma Kalaallit Nunaanni inuiaqatigiinnut qaninnerulersillugit.

“Aalajangiinerit aalisarnermut tunisassiornermullu qanittumi pisaraangata, aamma pitsaanerusarput. Pingaarnerpaatut Nunatsinni naleqarnerulersitsinissaq pillugu ingerlatsivugut, taamaattumillu soorunami aamma ingerlatsinitsinnut aallaavigisatsinni, tassa Kalaallit Nunaanni, nukittuumik toqqammaveqartariaqarpugut,” Toke Binzer oqarpoq.

Ukiup ingerlanerani suliniutit aalajangersimasut arlallit piviusunngortinneqarput, taakkulu ingerlatsinermut, immikkoortut akornanni suleqatigiinnermut minnerunngitsumillu aningaasaqarnermut sunniuteqarsimapput. 2024-mi aamma 2025-mi suliniutit taakku ataatsimut katillugit aningaasartuutit 150 mio. kr.-init amerlanerusunik  apparsartissimavaat:

• Peqqumaasivimmiittuutinik ikilisaaneq  

• Naleqarnerulersitsiniarnermi aqqut tamakkerlugu pilersaarusiornerup pitsaanerulersinneqarnera  

• Sumiiffiit assigiinngitsut akornanni suleriaatsit akimortumik ataatsimoornerulersinneqarnerat  

• Kalaallit Nunaata avataani allaffissornermi immikkoortortaqarfiit ikinnerulersinneqarnerat  

• Digitalikkut sakkunik pilersaarusiornermik aalajangiinermillu oqinnerulersitsisunik atuineq annerusoq  

2025-mi Royal Greenlandip ingerlatat suliffeqarfiup aningaasaqarneranut sivisuumik artukkiisimasut asooruppai. Tamanna ilaatigut Chile-mi Norgemilu ingerlatanut kiisalu Tysklandimi akileraartarnermut suliap pisoqaanerusup naammassineqarneranut tunngassuteqarpoq.

Torersaaneq ukiumut angusanut malunnaatilimmik pitsaanngitsumik sunniuteqarpoq, kisianni peqatigisaanik  siunissami aningaasaqarnerup pitsaanerusumik aallaaveqarnissaanut periarfissiivoq.

“Ingerlatanik aaqqissuussinerup kingunerisaanik siunissami nukivut pingaarnerpaamut atorsinnaanerulissavagut, tassa Atlantikup Avannaani aalisarnermut tunisassiornermullu, Kalaallit Nunaat qitiutillugu. Taamaattoq soorunami nunarsuarmi niuerfinni suli ingerlassaagut, tamanna tunisassiatsinnik niuerfinni assigiinngitsuni tuniniaasinnaanitsinnut, naggataatigullu Kalaallit Nunaannut naleqarnerulersitsinissatsinnut aalajangiisuummat,” Toke Binzer oqarpoq.

2026 pitsaasumik aallartippoq, ilaatigut niuerfinni akit suli pitsaasuunerat iluaqutaalluni. Tamatuma peqatigisaanik Royal Greenlandip ingerlatsinerup sunniuteqarluartup ukkatarineqarnera aamma pitsaasumik  

ingerlaarneq, ukiumoortumik nalunaarusiami takutinneqartoq, attatiinnarpaa.

“Suliassama pingaarnerpaartaraa Royal Greenlandip siunissami Kalaallit Nunaanni suliffeqarfittut nukittuujujuaannarnissaa qulakkiissallugu, suliffissanik pilersitsilluni nunamullu naleqartitsilluni. Upperaara aqqut eqqortoq ingerlavigigipput,” Toke Binzer oqarpoq.