Atorfinititsinerup  kingunerisaanik Royal Greenland-ip iliuusissatut aqutsineq nukittorsarpaa, nunallu tamalaani niuernikkut ingerlatsineq aammalu Kalaallit Nunaanni naggueqarnini nukittuumik inissisimanini uppernarsarpaa. 

Royal Greenland-imi siulersuisut siulittaasuat, Niels Thomsen tamanna pillungu oqaaseqarpoq: 

“Royal Greenland-ip nuannaarutigingaarlugu Toke Binzer-i tikilluaqquvaat. Toke piginnaasatigut nutaaliornikkullu  aqutseriaaseqarsinnaanini uppernarsarsimavaa. Siulersuisullu qilanaarput misilittagaqqortunerata aammalu aqutsinikkut 

suleriaasaa pissarsiaqaatigissallugu. Angusaqarusussutitsigut, suliniuteqarnikkut aammalu Kalaallit Nunaanni nukittuumik  tunuliaqutaqarnikkut assigiiffeqarpugut – taamaattumik suleqatigiinnissarput qilanaaraara”

Nunat tamalaani sulinikkut misilittagartooq sumiiffimmilu ilisimasaqarluartoq

Toke Binzer-ip nunat tamalaani suliffeqarfiit ingerlatsiviit IBM-imi aammalu TDC-imi sulinermini suliat allanngorartut  pisariusinnaasut – aammalu ineriartortitsinikkut suliniuteqarnerit misilittagaqarfigilluarpai. Misilittagartuunini nassataralugu suliffeqarfik nunat tamalaani ingerlatsiviusoq Royal Greenland-itut ittoq aqutsinikkut pitsaalluinnartumik ingerlatissagaa  naatsorsuutigineqarpoq. 

Saniatigut Tusass-imi pisortatut sulinermini Kalaallit Nunaanni inuussutissarsiorneq aammalu inuiaqatigiinni atukkat  ilisimalluinnaqqissaarpai. Nunat tamalaani sulinikkut misilittagartuunini aammalu sumiiffimmi ilisimasaqarluartuunini  najoqqutaralugit suliffeqarfimmi niuernikkut nunat tamakkerlungit siuttuuffiusumi aammalu Kalaallit Nunaanni suliffeqarfimmi pingaarnersaanni pisortatut sulinissaa naleqqulluinnarpoq. 

Tusass-imiik siulersuisut siulittaasuat, Ulrik Blidorf ilassuteqarpoq:

“ Suleqatigiinnerup nukittorsarnissaa aammalu aqutsinikkut piginnaasatigut avitseqatigiinnissaq suliffeqarfiit akornganni tamanut  iluaquteqarpoq. Toke Tusass-imili aallartikkami sulinikkut takutitsilluartuuvoq, iliuusissatullu pilersaarusiornerit eqqumaffigalugit  nukittuumik timitaliinikkut suliniuteqarnerit angusaqarfigalugit tunniussaqarluarsimavoq – qularinngilarpullu Royal Greenland-i  suliffeqarfittut nukittorsarnissaa isumannaarumaaraa”

Kalaallit Nunaanni tunuliaqutaqarnera

Toke Binzer-i Nuummi peroriartorsimavoq 2022-milu nuliani erninilu marluk peqatingalugit Tusass-imi atorfittaarnerminut atatillugu illoqarfimmut utersimalluni. Kalaallit Nunaanni perorsimanini tunuliaqutaralugu Royal Greenland-ip inuiaqatigiinnut suliffeqarfittut  aammalu aningaasaqarnikkut pingaassusaa ilisimmaarippaa.

“Royal Greenland-imi pisortaanertut atorfinilluni assut tulluusimaarnarpoq. Suliffeqarfimmi inuiaqatigiit akornganni ulluinnarni

ammalu aningaasarsiornikkut pingaarluinnartumik inissisimammat. Qilanaarpunga suliffeqarfimmi sulisut tamarmik peqatingalugitniuernikkut tunisassiorneq nunat tamalaani Kalaallit Nunaannut iluaqutaasumik naleqartitsisumillu nukittorsassallugu.