Suliffeqarfiup aaqqissuussaanikkut siunnerfianik aamma aningaasaliinissamut pisariaqartitsinerit piviusut ataatsimut naliliiffigineqareernerisigut aalajangiisoqarpoq. qeqqussanik tunisassiat niuerutigisassanngorlugit annertussarnissaanut annertuumik aningaasaliisoqartariaqarpoq, aamma massakkut aningaasaqarnermi tunisassiioriaatsit pioreersut aningaasaliiffiginissaat pingaarnerutinneqarput - ilaatigut nunami tunitsivinnik nutarsaarnikkut pitsanngorsaanikkullu.

"Suliniummi suliarisimasagut tulluusimaarutigaagut. Pingaarutilinnik ilisimasaqalerpugut, patajaatsunik suleqateqalerpugut aamma minnerunngitsumik misilittagaqalerluta Kalaallit Nunaanni nutaaliornermi piujuartinneqarsinnaasumillu inuussutissanik tunisassiornermi suliaqaannarnissatsinnut," pisortaanerugallartoq Preben Sunke oqarpoq.

Suliniummi ukiut tallimat ingerlaneranni naatitsinermit katersinermut aamma asiunaveersaartitsinissamut tunisassianik ineriartortitsinissamut misissuisimavugut, ilaatigut qeqqussanik pestolianik aamma qeqqussanik salaatilianik misileraalluta nioqqutissiorsimalluta. Piffissap ingerlanerani Royal Greenlandimit suliaqartut Arctic Seaweed, Nordisk Tang aamma DTU Food suleqatigineqarput, aamma suliniut suliffeqarfiup iluani aamma tamanit soqutigineqarsimavoq - pingaartumik piujuartinneqarsinnaanera pissutigalugu.

"Uatsinnut pingaaruteqarpoq erseqqissassallugu, qeqqussat tunisassiarineqarsinnaanerannut upperinninnginneq pineqanngimmat.  Tassanilu qugukkut tunisassiorsinnaanissaq aamma akisussaassusilimmik pingaarnersiuinissaq pineqarpoq. Massakkut misilittakkat tigussavagut siunissamilu Royal Greenlandimi inuussutissalerinermi qeqqussat ilaaatinneqalernissaannut periarfissat ammatillugit," Preben Sunke oqarpoq.

Royal Greenland sulisunut, suleqatigisanut aamma soqutiginnittunut tamanut peqataatinneqartunut ilisimasaminnik, tunniusimanermik aamma suliniummi piumassuseqarluarnerannut qujassuteqarpoq.