Royal Greenlandip saarullimmit ataatsimit maannakkut ukioq manna aallartinneraniit ikinnerusunik isertitaqaraluarluni, aalisartut 2026-mi qaammatini pingasuni siullerni isertitaannut naleqqiullugu suli amerlanerusunik isertitaqartassapput.

Saarullinnik avammut tunisinermi akit appariaraangata, niuerfinni ineriartorneq malillugu naleqqussartariaqartarpugut. Akit iluarsineqarnerisa aalisartunut pisariaqanngitsumik sakkortunerpaamik sunniuteqarnissaat kissaatiginngilarput. Taamaattumik saarulliup sapinngisamik annertunerpaamik naleqalersinnissaa anguniarlugu sulivugut, taamaalilluta tunisinermi akinik appartitsinissaq pisariaqannginnerulersinniarlugu,” Royal Greenlandimi saarullinnut ingerlatsinermut pisortaq Sten Sørensen oqarpoq

Assersuutigalugu aalisakkat sinneri amerlanerusut atorluarnissaat sulissutigineqarpoq, taamaalilluni sapinngisamik annikinnerpaamik igitassaqartarluni. Tamanna ilaatigut saarulliit niaquinik atuinermut tunngavoq. Ullumikkut niaqqut tunisassiorfinni suliarineqartarput, tunineqartussanngorlugillu nunanut allanut niuerutigineqartarlutik, siornatigut igiinnartarsimagaluartut.

Assersuutigineqarsinnaavoq saarulliit Nutaaq, taakkua immikkut ittumik pitsaassuseqarnerat pissutigalugu niuerfinni akisunerusumik tunineqarsinnaallutik. Royal Greenlandip Nutaaq-p nunanut allanut, ilaatigut Amerikap avannaanut, tuniniarnissaanut periarfissagissaarpoq. Taamaattumik saarulliit nalinginnaasut tunisinermi akii maanna iluarsineqaraluartut, Nutaaq-p tunisinermi akia allanngortinneqassanngilaq.

Saarulliup sapinngisamik annertunerpaamik naleqalersinnissaa tassaavoq niuerfinni akit nikerarnerinut pitsaanerusumik piareersimanissamut aqqutissaq pitsaanerpaajusoq. Tamanna pillugu pitsanngoriartorpugut, aalisartullu Nutaaq-saarullinnik tunisinerup kiisalu tunisassiornermi sinneruttunik atorluaanerup tungaatigut suleqatigilluarnissaat nuannaarutigaarput. Tamanna avammut tunisinermi akit appariaraangata tunisinermi akinik appartitsinissamut pisariaqartitsineq annikillisissinnaavaa, Sten Sørensen oqarpoq.