Qungujulaartut nuannaartullu takussaapput, ullumi atuartut 21-it Nuuk Internationale Skole-miik puiaasaq immikkuullarissoq Royal Greenland-ip kilisaataani Kaassassummut inuttanut tunniukkamikku. Puiaasaq GPS-ligaavoq, atuartuniillu inuulluaqqussutinik allattuiffigineqarsimalluni, suliniummi Plastic in a Bottle-mi ilaalluni. Suliniut paasissutissiillunilu ersersitsissaaq plastikkit immamut eqqakkat qanoq sarfaq malillugu ingerlaartarnerannik. Inuttat puiaasaq immamut igissavaat sinerissamiit 100 sømil-mut killikkunik, Nuup Sisimiullu akornanni. Paasissutissat GPS-ip katersorsimasai tunngavigalugit piffissami ungasinnerusumi imaani eqqakkat pillugit iliuuseqartoqarsinnaalissaaq.

-Imaq Kalaallit Nunaanni inuunitsinnut qitiulluinnarpoq. Nerisassanik pilersortarpaatigut, kulturitsinnut ilusilersueqataavoq, kinaassutsitsinnullu ilaalluinnarluni. Taamaammat immap ataqqilluinnarnissaa pisariaqarpoq. Taamaattumik pissusissamisoorpoq Royal Greenland suliniummut Plastic in a Bottle-mut ilaanera. Puiaasaq aningaasaliiffigivarput, kilisaatinik inuttaanillu suleqataasitsilluta.Eqqumaffiginnilersitsissagatta, paasissutissanik katerseqataalluta, allannguinissamullu suleqataalluta- imartarput pillugu, Nunarput pillugu aammattaaq kinguaagut pillugit. Taamak oqarpoq Bodil Marie Damgaard, Royal Greenland-imi Sulisoqarnermut Attaveqarnermilu pisortaq.

Ullormi matumani tunniussinermi aamma Issittumi aallartitaq Kenneth Høegh kiisalu Aalisarnermut, Piniarnermut, Nunalerinermut, Imminut Pilersornermut Avatangiisinullu Naalakkersuisoq Peter Borg peqataapput.

Suleqatigiilluni iliuuseqarneq

Nuummi puiaasap atuartunit tunniunneqarnerata saniatigut Sisimiuni atuartut aamma Royal Greenland-ip kilisaataata Avatap inunnai puiaasamik tuninikuuaat, taakkualu Qeqertarsuup avannaani puiaasaq avammut miloriuppaat.

Immamut miloriussinerit aaqqissuunneqarput Avatangiisinut Aqutsisoqarfimmiit, Århus Universitetimiit, Namminersorlutik Oqartussaniit aamma Oceans North Kalaallit Nunaanniit (imartat sinerissamilu sumiiffiit pillugit ilisimasanik piorsaanissamik suliaqatuniit), aammalu PAME-miit (Protection of the Arctic Marine Inviroment) aamma Royal Greenland-miit.

Puiaasat miloriunneqartut marluk puiaasat qulingiluaralugulu qulissarivaat, PAME-kkut suliamut atatillugu immamut miloriussaannut suliamut 2019-mi aallartittumeerlutik.